قالت له: إوا سيدنا رمضان قرب، جيب لي القوام د السفوف و الشباكية
شعل معها: واش يحساب لك أنا الفلوس كايطيحو علي من السما! قالت لك السفوف و الشباكية مزيان تبارك الله!
شافت فيه و تبسمت بلا ما تتكلم..
تهدن و قال لها: غانجيب لك قوام حاجة وحدة، اختاري يا السفوف يا الشباكية.
ـ واخا آ سيدي ما تبقى غير على خاطرك، جيب لي التقضية د السفوف حيت عارفة عزيز عليك تاخدو فالسحور.
ملي وصل رمضان، حطات كل ما لذ و طاب فالفطور الاول لي كيكون ديما منوع و مميز، و حطات طبسيل فيه السفوف و آخر فيه الشباكية. ملي انتبه سولها واش شراتها ولا دوقاتها شي جارتها، قالت لو لا أنا لي صاوبتها.
ـ كيف درت ليها؟
ـ كل مرة ملي كنوصيك فيها على شنو لي خاصني، كنزيد شي حاجة من مستلزمات الشباكية و كاتجيبها وسط التقضية بلا ما تحس. حتى جمعت كلشي و صاوبتها.
ضحك و قال ليها: هادشي علاش كنبغيك يا هاد العفريتة
القصة حقيقية و عنوانها الحيلة أحسن من العار أو الزوجة الذكية أو رمضان قرب اللهم بلغنا إياه
